Xuntos pola inclusión, un evento polo Día Internacional da Discapacidade

A Fundación Breogán, co apoio de Cafés Candelas, organiza o próximo 10 de decembro o evento “Xuntos pola inclusión”, unha xornada aberta e participativa para conmemorar o Día Internacional das Persoas con Discapacidade. A cita terá lugar no Pazo de Feiras e Congresos de Lugo e está dirixida a todas as asociacións e colectivos lucenses que queiran sumarse a esta celebración.

O evento contará cunha variada programación pensada para fomentar a inclusión, a diversión e a participación de todas as persoas, independentemente das súas capacidades. Entre as actividades previstas destacan:

• De 10:00 a 13:00 horas: inchables deportivos, máquinas de arcade, xogos interactivos, touro mecánico, mini golf, pistas de slot, xogos populares e obradoiro de pintacaras.

• De 13:00 a 14:00 horas: espectáculo do Mago Rafa, que sorprenderá a grandes e pequenos co seu show cheo de maxia e humor.

“Xuntos pola inclusión” nace co obxectivo de sensibilizar á sociedade sobre a importancia da igualdade de oportunidades e a participación activa de todas as persoas, promovendo un espazo lúdico e de convivencia para asociacións e familias.

A entrada é libre e gratuita, e invítase a todas as asociacións de Lugo a gozar dunha xornada que combina entretemento, creatividade e concienciación social.