Café Candelas

Cafés Candelas marcou xa os seus obxectivos para o ano 2016: incrementar ata o 5% a súa facturación anual en base á diversificación de productos e liñas de negocio e en base á fidelización dos clientes. A empresa cafeteira, líder nacional no sector da hostalaría, rematou o ano 2015 con cifras positivas, pero é consciente de que a clave para manter o liderato no sector é apostar pola innovación e o investimento.
Durante o ano 2016 Cafés Candelas traballará para potenciar dúas liñas de negocio: exportación e vending, que ata o momento supoñen só o 3% e o 1% da facturación global da compañía, respectivamente. O plan de negocio ideado por Candelas promocionará estas liñas para que medren e acheguen unha meirande facturación á empresa. Neste senso, apóstase tamén polo lanzamento de novas referencias, novos produtos cos que incrementar o catálogo e cubrir as demandas do mercado e dos novos consumos.
Por outra parte, Candelas prestará especial atención ao seu pilar básico: os clientes, para o que traballará nun plan de fidelización co que ofrecer aos seus clientes os mellores produtos e servizos.
Calidade, innovación, formación e atención ao cliente serán as claves da compañía e marcarán as liñas durante o presente ano. O obxectivo é medrar, pero medrar de maneira sostible en todos os sensos, en volume de negocio, en imaxe de marca, en formación, en comunicación, en calidade. Só así se pode garantir o éxito e a permanencia dunha marca que conta xa con máis de 40 anos de experiencia no sector.
Balance 2015
Nos últimos anos o mercado do café en España experimentou un notable descenso na canle Horeca, mentres que resistiu mellor na canle de Alimentación. A pesar desta situación negativa, Candelas mantivo o nivel de investimento e a aposta pola innovación, claves para garantir o crecemento sostible e a permanencia da imaxe de marca positiva no mercado.

Só durante o pasado ano, Cafés Candelas investiu máis de 3 millóns de euros en melloras na cadea de produción, na creación dun novo espazo formativo nas instalacións e na promoción do plan de formación da empresa para empregados e clientes.

Grazas a esta aposta, Candelas mantivo os niveis de facturación durante os anos da crise. En 2015 Cafés Candelas comercializou 4.730 toneladas de produtos (4.705 toneladas de cafés e 25 toneladas de tés e infusións) e acadou os 53,4 millóns de euros  de facturación (un 6% máis con respecto a 2014), superando a cifra do ano 2014 fixada nos 50,35 millóns de euros e as 4.488 toneladas de produtos comercializadas. No ano 2013 Candelas rexistrou 4.471 toneladas de produtos comercializadas, cunha cifra de facturación de 49,56 millóns de euros.

Para o 2016 Candelas tamén ten previsto investir no lanzamento de novas referencias de produto.